Tanıtım Metni:
Demê welatê de wau u bıraê benê. Namê lazeki Alık, namê çêneke Fatıke bena. Ni maê ra sey benê. Maa xo ke mırena, pi dêmar ano Alık u Fatıke rê.
Na dêmari ra ki lazek u çênekê benê. Dêmar, domanunê xo rê yemeg pozena, Alık u Fatıke rê ki wela adıri kena lop dana cı. Alık u Fatıke sonê mal u gau ver. Mal de berbenê, jivenê manga bore yêna ra zon vana:
-Alık, Fatık sıma ça bervênê?
Alık u Fatıke, manga bore ra vanê:
-Maa ma merde, piê ma dêmari arde ra ma serı, a ki ma rê heşireni kena, domanunê xo rê yemeg pozena, ma rê ki wela adıri ana. Ma vêsan verdana.
Ni wa u bıra ke nia vanê, manga bore vana:
-Alık, Fatık bêrê iştirunê mı akerê tede werd esto, xo rê vezê borê.
Alık u Fatıke iştirunê manga bore kenê ra tede hazar turlu werd beno. Vezenê wenê xo kenê mırd.
Dêmar domanunê xo rê şir, zırfeti, keska, bişi, roneni pozena. Oncia ki niadana ke domanê xo benê zar. Alık u Fatıke benê hewl.
Rozê dêmar lazê xo Alık u Fatıke de rusnena mal ver, vana:
-Ala tey so, ni se kenê? Çı wenê?
Lazê dêmari Alık u Fatıke de sono mal ver. Fatıke, lazeki ra vana:
-Bıra to ke tıka çı di çê de maa xo ra mevaze.
Lazek vano:
-Ya, ez nêvan.
Lazek sond weno. Alık u Fatıke sonê iştirunê manga bore kenê ra cı ra werd vezênê, anê wenê.
