Serra ki piyê cı bı imam, bar kerd şı dewda Alosi, Fexri u Abekıri ya şeş serrey bi. Serra verên dewda xo dı şi bi wendege la nêşa bi Tırki rınd bımısê; coka wendegedê Alosi dı zuwandê Tırki dı zorey ant. Şi Alos, payız bı. Pêrê cı hım bırayo pil Zıfqar hım zi Abekır u Fexri berdi, teslimê wendegey kerdi. Sınıf dı kesi Zazaki nêzanayê.
Heta nêşi bi Alos, bırayo pil Zıfqar serrê şı bı Dewda Bêsini, wendegeyo sıfteyêno panz serran dı wend bı. Ê serran dı, dı tewr wendegey esti bi; wendegeyê hirı serran u ê panz serran. Wendegeyê hirı seran dı egitmani, ê panz seran dı muskari (malimi) gurweyayê. Buderan dı keyeyê kı waştê qeçê cı wenden po bıberê rıştê Bêsin, dıdına serri wendê panz seri kerdê temam. Muskarê dewda Bêsini sukda Qoniya ra Remezan bı. No muskar dıma, keynaya Xıdırdê Weskan Zılfi ya zewıjiya, bı zamayê Buderani.
Bırayo pil wuza dı tayn Tırki mısa bı. Bırayo pil Zıfqari serrê çıharın u panzıni Bêsin dı wendi bi; a Tırkiya ey Alos dı xo reyna la Abekır u Fexri demeyê zorey ant; insan kı Zazaki qısey kerdê qeçê Alosi pey wuyayê, muskari qirayê pıro. İnan Tırki, qeçanê Alosi u malıman Zazaki nêzanayê; lal u kerri mendi bi. Alos hirı mahleyi bı; cêr dı mahlaya Odebaşıyan u mahlaya Çeperan ew lewedê paştiya Mahlaya Cori est bi. Mabênê ê cêr u cori pêro baxçeyi u bostani bi. Vanê kı eslê Odebaşıyan Zaza biyo. Nê wextê dı Palê ra werıştê, şıyê o verdê Roy dı dewa Alduşı Qersig ware kerdo; wextêna zi wuza ra werıştê şıyê, Kodê Siyaydê eşırandê Tırkmenan u Kurdan miyan dı ronayo. Tesirê Tırkmenan dı Zazaki vira kerd bi; Tırki qısey kerdê hım zi Kırdasi zanayê.
