Tanıtım Metni:
Mela Kamılê Pueği, şairê zıwanê Zazaki yo u teyna Zazaki nuşta. Ey, bê tehsilê medresa u eskerayi heme heyatê xu zi Çolig dı viyarnayo.
Mela Kamılê Pueği, hem mela yo hem zi muderis o. Heyatê ey pê wendış u dersdayiş viyerto ra. Wextê melati ra heta ınka bı usılê medresa ders dano. Teqawıti ra pey mudeyêko derg Çolig dı bınê Camiya Heci Xıdıri dı yo cayê ey bıbı u ıno ca sey medresa bı. Xu ra serê berê ınê cayi dı Mela Kamıli hına nuşt bı: “Tiya dı ihtiyaciya dini ê her kesi yena diyayiş u cewab diyeno her sual.” Mela Kamıl ıno dustur ser bı, hema zi ıno gureyê xu rê dewam keno.
Mela Pueği teqawıti ra pey dest kerd pê u şiiri Zazaki nuşti. Ey vist serr ra nat çiyo ki nuşt, hemeyê inan ciya ciya çend defteran dı ardi pêser. Ge yo kağıdo muswede dı şiir nuşta ge yo defterêko qıc dı çend çarrêzi nuşti. Heme nuşteyi xu mıhafeze kerdi u nımıti.
Ina xebat hiri qısıman ser inşa biya. Qısımo verin dı, bı melumatanê neweyan u teferruat ca diya heyatê Mela Kamılê Pueği yi. Qısımê dıyın dı diwanê ey hetê şıkıl u muhtewa ra ame tetqiqkerdış. Qısımo peyin dı zi transkripsiyonê metnê diwani ca geno.
