Cayêk beno cayêk nıbeno. Yo miyerık zerr kuweno yo kêna. Kênek zi hend rınd a hend rınd a insan qêmiş nıbeno bun kênek ra. Ino miyerık u kênek yobinun ra zaf hes kên u zewıjyên.
Ini zewıjyên, yo kênayê yın bena. Ina kênayê yın hend rınd a hend rınd a merdım qêmiş nıben yo dor zi bun tı ra, tı vun qê tijê aşm a. Nameyê ına kênek Hebıkê Henar nuni pa. Ruej ruej ser viyereno, aşm aşm ser viyerena kênek bena pil, bena kênaya ezew. Ina Hebıkê Henar çıqas bena pil, dıha zaf bena rınd.
Yo ruej dadiya Hebıkê Henar bena nıweş, kuwena cılun u mırena. Hebıkê Henar yetim manena. Hebıkê Henar u babiyê xu têna cuyên. Benate ra xeylêk waxt viyereno. Hebıkê Henar zi zerr kuwena yo şune. Tor ıno şuneya zerr kuwên yobinun, yobinun ra zaf heskên u qayili bızewıj.
Hebıkê Henar zi qayila xu ri bızewıj labelê babiyê kênek nıverdeno kênek bızewıj. Ino şune her ruej şıno vêr pês. Yo ruej beno şund, şune waxto ki şıno keye hêvêr şıno vındê babiyê kênek, kênek babiyê cı ra wazeno u hama duno ra
şıno keyê xu. Şune şıno kênek wazeno labelê miyerık kênayê xu nıduno. Hın teselê şune kuwena u şıno.
Yo ruej, dı ruêj, hiri ruêj… Şune nızdê yo aşm şıno kênek wazeno labelê babiyê kênek, kênayê xu nıduno. Babiyê kênek tımotım şıno sêd keno u yeno. Kênek zi têna keye dı vındena, gure kena.
